Non sabía apenas nada da historia deste navío, aínda que sabía que non foi un naufraxio típico (se se pode dicir que algún o sexa). Logo de dicirme ao min mesmo que non mercaría máis libros, adquirín este breve título cunha tenebrosa mariñeira de Henry Van de Velde fillo na portada.

O libro consiste nun breve ensaio histórico do destino que sufrira o Batavia e a súa tripulación en naufragar preto das costas de Australia, cando se dirixía á actual Iacarta. O texto consiste nun superior exercicio de síntese (loado por moitos, como por exemplo Enrique Vila-Matas) por parte do seu autor: Simon Leys. E digo superior porque parece incrible como Leys fai caber en oitenta e poucas páxinas a historia relacionada co barco, o sucedido antes da súa viaxe e máis o ocorrido despois do naufraxio. Lectura breve e de contido concentrado que devén unha lectura de pracer.

Pero que drama chegar á última páxina! Non sei se outros lectores quedarán tan insatisfeitos coma min ao ler Los naúfragos del Batavia. Eu quedeime coas ganas de saber máis de case todo. Do encontro que tiveron patrón e sobrecargo antes de formar parte da tripulación, da construcción do navío, dos seus tripulantes, da viaxe, do motín que se argallaba, do naufraxio mesmo, do pintor “Torrentius”, dos soldados que enviados á morte lograron atopar auga potable….

Pero non nos enfademos aínda. E sobretodo, non nos enfademos co autor. Este xa explica que non pode nin pretende engadir máis á fantástica monografía de Michael Dash sobre o suceso: Batavia’s Graveyard, traducido ao castelán por Núria Salinas co título La tragedia del Batavia.

Pois nada, aceptemos a invitación que supón o título de Leys ao libro de Dash. Agora que… imos ter un pequeno problema, porque esta edición en castelán está esgotada, a pesar de ser un libro de 2003 (!?). Sen chegar a ser isto motivo de enfado, se o é de auténtica decepción. A ver se a publicación do libro de Leys anima á editorial a deixarnos ler o libro de Michel Dash.

Batavia. Réplica a escala real, by pakelc. (CC BY-ND 2.0). http://www.flickr.com/photos/31683750@N02/

LEYS, Simon. Los náufragos del Batavia: anatomía de una masacre. (Les Naufragés du Batavia. 2003). Tradución de José Ramón Monreal. Barcelona: Acantilado, 2011. 85 p. 18 cm. (Cuadernos del Acantilado: 48) ISBN 9788415277408.

Deixa un comentari

L'adreça electrònica no es publicarà Els camps necessaris estan marcats amb *

Podeu fer servir aquestes etiquetes i atributs HTML: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>